ದಿನಕ್ಕೆ 3 ಕೆಜಿ ಮೆಣಸಿನ ಕಾಯಿ ತಿಂತಾನೆ ಈ ಭೂಪ!

ಸಾಂಬಾರಿಗೆ ನಾಲ್ಕು ಮೆಣಸಿನಕಾಯಿ ಹಾಕಿದ್ದಾಗಲೇ ನಾವೆಲ್ಲಾ 'ಅಯ್ಯೋ ಖಾರ..' ಅಂತ ಗಡಾಯಿಗಟ್ಟಲೆ ನೀರು ಕುಡಿಯುತ್ತೇವೆ. ಅಂಥದ್ದರಲ್ಲಿ ಇಲ್ಲೊಬ್ಬ ಭೂಪ ದಿನಕ್ಕೆ ಏನಿಲ್ಲವೆಂದರೂ 3 ಕೆಜಿ ಖಾರದ ಮೆಣಸಿನಕಾಯಿಯನ್ನು ನಿರಾಯಾಸವಾಗಿ ತಿಂದುಬಿಡುತ್ತಾನೆ. ಈತನಿಗೆ 'ಮೆಣಸಿನಕಾಯಿ ರಾಜ' ಅನ್ನೋ ಹೆಸರಿದೆ.

ಮಧ್ಯಪ್ರದೇಶ ಉಜ್ಜೈನಿಯವರಾದ ಪ್ಯಾರೆ ಮೋಹನ್‌ಗೆ ಖಾರ ಅಂದ್ರೆ ಕ್ಯಾರೇ ಇಲ್ಲ. ಇವರ ಮುಂದೆ ಕೆಜಿಗಟ್ಟಲೆ ಮೆಣಸಿನಕಾಯಿ ಇಟ್ಟು ತಿನ್ನು ಅಂದರೆ; ನಾವೆಲ್ಲ ಫಿಂಗರ್ ಚಿಪ್ಸ್ ತಿನ್ನೋ ರೀತೀಲಿ ಅಷ್ಟೂ ಮೆಣಸಿನ ಕಾಯಿಗಳನ್ನ ತಿಂದುಬಿಡುತ್ತಾರೆ. ಯಾವುದೇ ಬಗೆಯ, ಎಷ್ಟೇ ಖಾರದ ಮೆಣಸು ತಂದುಕೊಟ್ಟರೂ ಅದನ್ನು ಮೋಹನ್ ಸಲೀಸಾಗಿ ತಿನ್ನುತ್ತಾರೆ.

ಬಗೆ ಬಗೆ ತಿನಿಸು, ವಸ್ತು ತಿನ್ನುವ ವಿಚಿತ್ರ ಖಾಯಿಲೆ ಕೆಲವರಿಗಿರುತ್ತದೆ. ಜೇಡಿ ಮಣ್ಣು, ಪೇಸ್ಟು, ಬಳಪದ ಕಡ್ಡಿ, ಕಾಫೀ ಹಣ್ಣು, ಹುಣಸೇ ಬೀಗ, ಸೋಪು ತಿಂದು ಸೈ ಎನಿಸಿಕೊಂಡವರೂ ಈ ಜಗತ್ತಿನಲ್ಲಿ ಇದ್ದಾರೆ. ಆದರೆ ಖಾರದ ಮೆಣಸು ತಿನ್ನೋದಂದ್ರೆ ತಮಾಷೇನಾ?

ಪ್ಯಾರೆ ಮೋಹನ್ ಅವರು ಕೆಜಿ ಕೆಜಿ ಮೆಣಸು, ಮೆಣಸಿನ ಹುಡಿ ತಿಂದರೂ ಆ ಬಳಿಕ ಒಂದೇ ಒಂದು ಗುಟುಕು ಕೂಡ ನೀರು ಕುಡಿಯೋಲ್ಲ. ಇವರಿಗೆ ಖಾತರದ ರುಚಿಯೇ ಗೊತ್ತಾಗೋಲ್ಲವೋ ಏನೋ. ಪಾಪ ಮೋಹನ್ ಅವರ ಹೆಂಡತಿ ತನ್ನ ಗಂಡನಿಗೆ ಖಾರದಡುಗೆ ಬಡಿಸಬೇಕು ಅಂತ ಆಸೆಯಿಟ್ಟುಕೊಂಡರೆ ಅದೇನು ಸರ್ಕಸ್ಸು ಮಾಡಬೇಕಾಗಬಹುದೋ ಆ ದೇವರೇ ಬಲ್ಲ!